型仔靚女健兒賀聖誕
東方日報二千年十二月二十三日
聖誕節普世歡騰！各位型仔靚女運動員都唔執輸，趁住明晚平安夜剝晒波衫剝晒波鞋，齊齊放鬆一下去Fever，實行同至愛至Friend玩到癲，迎接聖誕節嘅來臨，仲有天馬行空許下瘋狂嘅聖誕願望，當然唔少得祝各位《東方日報》讀者歡度「Merry
Christmas」！
力申恨高多幾吋喎
人氣急升嘅「飛魚」方力申（Alex）近五年第一次響香港過聖誕，「今年聖誕響屋企過較為特別，聖誕願望……再高啲囉……咁游水都可以游得快啲嘛！哈哈！」乖乖仔Alex聖誕節打算同至愛嘅屋企人度過，不過唔諗住交換禮物囉，有人送就當然唔拘啦！
曉慧去日本過新年
聖誕節約定同學去完長洲宿營之後，幸福小飛魚蔡曉慧（Sherry）就同爹哋媽咪開開心心去日本玩雪過新年，Sherry已經諗定心目中嘅聖誕新年禮物，就係要手表同MD機，真係令人羨慕。
阿迪來年努力搵銀
已經有「車仔」，好快又擁有自己嘅「屋仔」嘅「阿迪」潘文迪，聽日平安夜仲要比賽，但係打完波點都要去玩個暢快，約好同朋友食聖誕自助餐擦餐飽，之不過後日仲有任務在身，要做完足球示範先至Free！新一年「阿迪」希望事業更上一層樓，同埋努力搵銀，莫非要儲老婆本？
